ایرانی ذرائع ابلاغ نے بتایا ہے کہ وزیر خارجہ عباس عراقچی نے پاکستانی آرمی چیف عاصم منیر سے علاقائی صورتحال کی تازہ ترین پیش رفت پر تبادلہ خیال کیا۔
یہ ٹیلی فونک گفتگو بدھ کے روز ایرانی وزیر خارجہ کے دورۂ بیجنگ کے دوران ہوئی، جبکہ واشنگٹن اور تہران کے درمیان مذاکرات بدستور تعطل کا شکار ہیں اور فی الحال کسی معاہدے کے آثار دکھائی نہیں دے رہے۔
امریکی صدر ڈونلڈ ٹرمپ نے بدھ کے روز کہا کہ انہیں امید ہے کہ ایران کے خلاف جنگ کا خاتمہ قریب ہے۔ ایک الگ میڈیا رپورٹ کے مطابق توقع ہے کہ ٹرمپ آئندہ منگل کو اقوام متحدہ کی جنرل اسمبلی کے اجلاس کے موقع پر خلیجی ممالک کے رہنماؤں سے ملاقات کریں گے، جس میں جنگ سے متعلق امور پر بات چیت ہوگی۔
ایران کے ساتھ جنگ ساتویں ماہ میں داخل ہوگئی ہے، تاہم اس کے جلد خاتمے کے کوئی واضح آثار نظر نہیں آ رہے۔
امریکی ویب سائٹ ’’ایکسِیوس‘‘ (Axios) نے بدھ کی رات دیر گئے رپورٹ کیا کہ اگلے ہفتے نیویارک میں ٹرمپ اور خلیجی ممالک کے رہنماؤں کے درمیان متوقع ملاقات میں جنگ کے بعد کی امریکی حکمت عملی کے منصوبوں پر توجہ مرکوز کیے جانے کا امکان ہے۔
رپورٹ کے مطابق ٹرمپ خلیج تعاون کونسل کے رکن ممالک سعودی عرب، متحدہ عرب امارات، قطر، بحرین، کویت اور عمان کے رہنماؤں یا وزرائے خارجہ سے ملاقات کریں گے۔
دوسری جانب ٹرمپ نے بدھ کے روز صحافیوں سے گفتگو کرتے ہوئے کہا کہ انہیں امید ہے کہ ہم جنگ کے خاتمے کی جانب بڑھ رہے ہیں۔ایران کے بارے میں بات کرتے ہوئے انہوں نے مزید کہا:وہ ایک معاہدہ کرنا چاہتے ہیں۔ ہم دیکھیں گے کہ معاملات کیسے آگے بڑھتے ہیں۔یہ ان کے سابقہ بیانات کا ہی اعادہ تھا۔
ٹرمپ نے یہ بھی کہا کہ انہیں ایران کی جانب سے ’’براہِ راست‘‘ پیغام موصول ہوا ہے، تاہم انہوں نے اس کی تفصیلات نہیں بتائیں۔ایران کے خلاف امریکی اسرائیلی جنگ کے باعث تیل اور گیس کی قیمتوں میں اضافے کا معاملہ ٹرمپ کی ریپبلکن پارٹی کے لیے نومبر میں ہونے والے وسط مدتی انتخابات سے قبل ایک اہم مسئلہ بن گیا ہے۔
4
